قصيدة “بيانولا”.. جديد الشاعرة هالة العكرمي

أصدرت الشاعرة هالة العكرمي قصيدة جديدة بعنوان “بيانولا” وجاءت أبيات القصيدة كالتالي:

كلنا بنعيش على البيانولا
نسمع حكايات لاحباب اموات
من أول دوار العمدة
للساقية وزرعة عم سادات
والعزبه اللي ساكنها الناظر
و الباشا وكرباج اللذات
ما تقلش ازاي أو ليه ساكتين
على القهر ومر وعند سنين
دا قدرنا وعيشينه ف سكات
ف الصفحه الأولى نلاقى حياه
وف آخر سطر نلاقى ممات
اعزف لي كمان على البيانولا
أعصر أشواق متخبيه
وحنين ف القلب وف عنيه
ونهار مستني قدوم قلبك
يسأل ويفكر يوم فيه
رقصني باليه ع البيانولا
بٓيّن لي هموم سكنه ف وطني

قصيدة “بيانولا”

وقلوب م القسوة سبب صمتي
والطفل يا حسرة قلبي عليه
من قرصة جوعه ومن بؤسه
زلزلي كياني،كسر ضهري
وقلوب مقسومة متين حتة
مكسورة وهية سبب كسري
آااا ياورد حزين وف قلبه آهات
ياما شفنا البسمة على شفايفه
قطفتها الأيام المرة

ياما رسمت فى الليل قمراية
كان ضي عنيها أمل بكرة
من تاني،يا سحر البيانولا
من عطر زمان،من مغنى أصيل
عبد الوهاب،ثومة، وحليم
وطلب ونجاة،وطرب فايزة
وفريد،والعود يعزف تقاسيم
وشقاوة الحلوة الصبوحة
ع الدبكة تغنى جديد وقديم
ونميل ونهيم مع ليلى مراد
يا زمان الفن يا ريت تنعاد
لياليك الحلوة وأيامك
على أجمل لحن ننام ونقوم
يا بلدنا يا جنة أرض الله
واحة وطراحة بشاير خير
وضماير الناس المرتاحة قصيدة “بيانولا”
بقناعة ، وطيبة، وحب الغير
والكرم،الطبع المتأصل
فى اولاد البلد الرجالة
متفصل همة وشهامة
والبركة فى إيدين شغالة
وكرامة،وعزة،وعزم حديد
أجيال بتسلم للأجيال
فين راحت يا بلدنا الهمة
والذمة وإخلاص الجدعان
واللمة الحلوة والعيلة
والعيش والملح اللي بينصان
نتلاقي على الضحكة الحلوة
والكلمة الوعد أما بتنقال

فين هية الصورة اللي شافوها
الناس يا بهية بقالها زمان
أحوال جدت مش أحوالنا
وطبايع يا بلدنا دخيلة قصيدة “بيانولا”
ما تياله نحط الإيد فى الإيد
ونرجّع لبلدنا صفاها
تعزف أنغامها البيانولا
وتقول ماحلاها ام الدنيا
محروسة بناسها وإخلاصها
والذكر الخالد فى القرآن،،