الشاعرة جيهان النجار تكتب شعر  ” أرمي بياضك”

الشاعرة جيهان النجار

اكتب أي كلام وطحينة واوعى توقف
وان ملقيتش تَجَاوب خالص
اعجب نفسك واقعد سقف
ابسط روحك….قول أنا شاعر
عندى من الإحساس فدادين
واقدر اخلي الدنيا جميلة وارمي الفرح شمال ويمين
واقدر اجوز أيها عانس…واعمل كل مشاعري مكانس… للثوار جوه الميادين
واقدر اجيب الغايب فورا لو كان مين
وممكن اغير سلو بلدنا….وافرض هدنة
مابين العاقل والمجانين
أما إن كان علي زفت الطين أقدر اوقع قلبه ف رجله واقوله في ودنه صلاح الدين
أو حطين…..
واقدر اخلي العاقر تولد بدل العيل قول اتنين
والمربوط ينفك بنظرة
والمبسوط يضحك نوبتين
عاجبك واللا إن شالله ما عجبك
ربنا ياخد المؤذيين
أرمي بياضك….دا حنا ياواد….
بنبين زين….. بنبين زين.

الشاعرة جيهان النجار

اقرأ ايضا:

الشاعر محمد الشربيني يكتب قصيدة ” هُنَا “