علشان أوصافك أوصافي
وانا وانتي رضعنا من السرسوب
وشربنا كاسات بحر الصافي
طلعت أفكارنا ديوان مكتوب
عنوانه الحب اللي مابيننا
وآيات العشق اللي ف ديننا
تحكيها….. قلوب
وعشان في رباط وليوم الدين
عمرنا مانضل مع الضالين
ونتوه مع بعض ياضي العين
وان صابك شئ إوعي تخافي
هاتقومي أكيد وهاتتعافي
وانا وانتي واخويا مع الملآيين
هانعدي…… دروب
ياما دقت علي روسنا طبول
وشربنا الغدر المعسول
وكلآم في العدل المخنوق
ولآتاهت منك خطاويكي
والمولي معاكي بيحميكي
منصورة ف أكبرها حروب
جربي قربي توأمي روحك
أنا أصلاً حاسس بجروحك
وحياة الصدر اللي جمعنا
ماهايقدر باغي يوقعنا
أو أعيش….. مسلوب
ضميني ف حضنك ضميني
وبلآه… البوح
مش لآزم أقول لك حِبيني
أصل أنا مجروح
وكفايه عنيكي بتحميني
وباحب وادوب
أنا صابر والصبر دوايا
والشط المفرود علي بحرك
شاهد علي حبي وهوايا
وابني اللي إستشهد كان مهرك
واسألي… رملايه رملايه
والحبل السري اللي وصلنا
مادد ولآخر أوصالنا
ويارب ياشاهد أحوالنا
عدي…. المكروب
وعشانك ياابني أنا مستني
اعزف اناشيدك واغني
وامني النفس إني اسيرك
او عايش متهني ف خيرك
وجمايلك شايلآها كتافي
والحق بيسعي لإنصافي
أما المكتوب
هو المكتوب *
قصيدة” حفل تعارف “
عرفتك أصيلة ف سنين العجاف
عيون الخلايق ماليها القلق
واشوف الوحوش اللي جوه الرموش
أشوفني……. بخاف
واحاول أبرر واقول دا الغلآف
ألآقي اللي جوه الوريد اتخنق
واحبك في سري برغم الكفاف
ألآقي الشعاع اللي بيننا برق
وانتي النبيلة باركتي الزفاف
فرشتي حدودك بكل الطرق
وكان إعتراف
وحان القطاف
وقلب العيون اللئيمه إتحرق
فتشت ف روحي المركونه
جوه….. الزنازين
وسألت: أنا مين؟
فلقيت فرافيت مرميه ف جنب
أشلآء وحاجات ماتت م البرد
وبرغم الحلم المتداري
ورا حبة غيظ
سبتيني أدوّر علي حضنك
يمكن…. ألقاه
وياخدني…. الشوق
ويصحي المارد جوايا
والقالي شبيه
أو أفوق م التيه
أتاريكي لمستي القلب بتنهيده وداريتي علِيه
وكأنك روحي الملموسه
من روح عيسي
ونبينا…. الزين
فعرفت حقيقتي المخفيه
وانا مين،،، وانا فين؟
فعرفتك وحفظتك ضي
بيهديني في حبابي العين.
عرفتك حد
بيخلي الحدود واحده
مفيش فاصل مابين قلبك
وبين…….. شوقي
وروحي فارشها قدامك معديه
يادوب الرجل هاتخطي
علي الرمش اللي فوق شطي
ألآقي الصفحة مقريه
ماانا واضح ومين قدي
مدام حدك كمان حدي
عيونك سر غناويه
ابص لهم يشدوني
أغني لهم ينادوني
ألآقي الوعد والمكتوب
واشوفني ف حضرتك مجذوب
ونفحات الخدود هلّه
توصلني مع المحبوب
وقرص الشمس بيشبه
علي…. روحه
لقاكي حبيبتي في طموحه
وانا المحتار مع الانوار
وبين قلبي علي جروحه
عرفتك حد مش محتاج
لأي…… كلآم
حدودنا ف بعضها داخله
في كل… مسام
مع الأجسام.. مع الأحلآم
مع الأيام.. مع الحب
اللي راح يقدر علي الأوهام
واشوف فيكي الحياه سهله
ماهيش… صعبه
وتاخديني ف طواف روحك
أشوف بوحك
واشوفك طاهره كالكعبه
تعديني الحدود واعلي
واشوف ليل السُهاد حيران
تصحيني.. تضميني
تشديني لحدودك شد
أفوق وارجع لأروع حد
عشان حدك ماهوش لعبه
عرفت إنك دوا روحي
واكتر حاجه في طموحي
وقبل العمر مايولي
فرشت الفرشه وباصلي
دعيت ربي ومن قلبي
حلمت…. بجد
يطول العمر أو يقصر
بسيطه الحسبه لو بالعد
عرفتك قبل مااحسبها
واغلي سطوري بأكتبها
مفيش زيك ياقلبي حد.
قصيدة “عشر سلآمات”
عشر سلآمات ماتقضيكي
ولآكل القلب بدقاته
وهاعاتب نبضي اللي شاريكي
إزاي الشوق عدي وفاته؟
ميت مره هااطوفك وارقيكي
واسهر مع قلبي وفلذاته
وان مر الليل مره عليكي
هالآقيه يهدي لك أوقاته
أوقات…. أوقات
وعشر…. سلآمات
ياحبيبتي أكيد ماتقضيكي
داصحابي.. نجوم
وقمر…… مرسوم
يقدر ع العوم ويعديكي
وبساط الريح
مفروش ومريح
مستني بداية جولآته
رحلآت… رحلآت
وعشر سلآمات
ياحياتي أكيد ماتقضيكي
بعد التنقيب
أنا مش هاستني اروح لطبيب
ولآهاسمح إن العقل يغيب
ويقولوا إتجنن بهواكي
ولآهاسمع من قلبي آهاته
وهاجيب الميّه واوضيكي
ماانا قلبي عليكي وشبيكي
هادعي لك ربي يخليكي
ياملآك….. الروح
راح أقول وابوح
دا عشر سلآمات ماتقضيكي.
أشعار: محمد أبو المعاطي عضو اتحاد كتاب مصر
اقرأ ايضًا: