شيماء الغيطي تكتب شعر “مشروع وطن”

الشاعرة شيماء الغيطي

كان ياما كان
كان فيه زمان
مشروع وطن
مخنوق ومتغرب زمن
نفسه ف كل ولاده
يتلموا ف عينيه
يبكوا عليه
فتح عينين الصبح فيه
لقا العيال متقسمين
قسمة غلابه ومعدمين
تفاصيل غلط
وعقول زلط
نياشين لكل الأغبيا
والأغنيا
أما الفقير
مالهوش ملاذ
إلا ف ضريح
للأوليا
متلزقين جمب الحيطان
ندعى بطولة العمر
للى مات جبان
ياللى أنت من زمن العجب
نفسك مهان
مسطول وحلمك كله
كان شيئء م الجنان
ياربيع بديع الإبتداع
كل اللى طلبك فالحلال
دق ف دماغك مية صداع
راشق عشانك فالصراع
رافض مرارة الإنصياع
هوه أنت كنت
أنت اللى باقى من الألم
والا البقيه
من اللى ضاع ؟
كل اللى مثل
باللى باقى ف جثتك
سخسخ فرح
وأنا كنت عاجن
من طموحى جنتك
وهم وطرح
رفرف طابور الإنتظار
بكلام جنان
مجنون وزاهد زيهم
أل ف الحنان
لميت حروف الشرك
بالوطن المهان
وأخدت روحى
وكام جدع
لحدود وجع
مرجعش منا
غير ضمير غرقان
طرطق ودانك
ياللى جاى زعلان
مفيناش ألم
أكتر من الغلبان
مفيناش مراره وذل
أكتر من كده
مفيناش مرارة
نطبب الميزان
شنطة وجع
مليانه غلب سنين
لما إترميت فالبحر
طرحت وطن
رحلة برئ
بتمرجحه الطواحين
يوم إمتهان الذل
صبحت سكن
ناجى وغريق
ومابيننا لسه سكون
نصبة كلام وجعه ماهوش فينا
صلب الكلام
من كل شكل ولون
أما السكوت
مبقاش يليق بينا