الشاعرة إيمان مصطفى تكتب قصيدة “مولد يادنيا”
الشاعرة إيمان مصطفي
زحمه ومرسى
وأرض واسعه ضيقه
مراجيح بتحدف
نن عيني مبحلقه
أرجوز بيرقص
جوه شاشه مزوقه
والحاوى طبعه
سرقة العين والعقول
يخدك بعيد ويرجعك
وانت الفضول هيجننك
إياك تخون من أمنك
على فكة العمر اللى تاه
جوه شوارع الحياة
اقرا رسايل هدهدك
واياك شيطانك يبعدك
انطقها حق
أحفر بروحك ميت مدق
على سكة الصح اللى شق
ريق الزمان
نشن على خوف الجبان
أما اللى خان
إديله طلقه بين عنيه
تكسب دهب
اطلعبه على سوق العجب
واعلن مذاد
واياك تبيع
أحسن يقولوا عليك وضيع
ساوم عليه
بالفرح يمكن تلتقيه
فتعيش بقا
برا حدود الدقدقه
فات اللى فات
الحلم غرقان إمدادات
يحدف ساعات أفراح ورق
وسواعى روحك تنسرق
تقوم على حالة قلق
بتفسرك تفسير كتير
فتقول دا خير
بأصحاب العقل الكبير
فكرك أسير
محتاج لفديه تحرره
اسعى لربك كبره
واطلب مدد
يمكن تنول
وتكون الرسول
تلقى فى دنياك القبول
وتقطع الاحبال تقوم
لم العرايس فى الهدوم
اقلع قناع الارجوزات
لم البنادق من سكات
وادفن رصاص الإحساسات
جوه الزمن
واياك تساوم ع التمن
تلقى الطريق
إيمان مصحبك بيناديك
وتبل ريق
الدنيا على مشهد حلال
وزع حلاوة ع العيال
اذن وقم
فات اللى فات الجاى أهم
قصيدة مولد يادنيا للشاعرة إيمان مصطفي
