“ليه لازم”.. قصيدة جديدة للشاعرة أميرة الغرباوي
وليه لازم تتوه مني ليالي العمر
في قلب فراق مع الأحباب
أعيش فيها كما الأغراب
أقع أشتاق لسندة ضهر
وشوقي رحايا مسحوبة ومسنونة
ومشحونة بهجر في هجر
قالت تهرسني تفرمني
لـٰهي واقفة واللا بتخلص واللا بتمُر
وليه تحبس لي نبض الروح
تعلي السجن والأسوار بحبة غدر
وتفرش فرشتي أشواك
ويتشرشب من وريدي هواك
تتاوي الباقي من أملي
برشة ملح جوة الجرح
وليه عاوز تكون القاضي والسجان
وتصدر حكم
يعيش عمري
يا دوب إن عاش و في الإنعاش
يقول محتاج لضخة حب
ألاقي الحب متكسح واللا بيعرج واللا يخطي
مهو من بدري طفى الشمس
لضمت الآهة بالآهة
وقلت هاتوا لي يا ناس إبرة
ترقع اللي متبقي يسرسب لي شوية عمر
يا طول الصبر بعد الصبر
و ضخ القلب محلول مُر
أجي أعيش عشان أحلم
ألاقي الحلم مات في المهد
وليه الفرح بقي معصوب
بشال منقوشة بالأحزان
وليه لازم يكون في كلامنا
زرع جبان يخاف يطرح
علي جبينا صفا وأمان
وليه نغرق في أوهامنا
يتوه مجدافي في عنادك
يضيع الشط والمرسى
في بحر شكوكي و الحرمان
وليه تدبح شمسنا بكرة بفكرة
يا دوب مهاش فاكرة
غير إننا شوية عجز
وإن يمينا مشي بالعكس
ما شوفنا إشارة واللا إنذار
واللا ضحايا وسط النار
و صندوق إسود ملان أسرار
وأنا صندوقي عشان يفتح
محتاج إننا نكون أحرار
أنا وإنت نكون أحرار
“ليه لازم”.. قصيدة جديدة للشاعرة أميرة الغرباوي