شيماء لغيطى تكتب : شمس غزة
الضحك عز وليلنا بيطول
تيجى النهايه نجيبها م الاول
مين اللى خانك ؟
كلهم ساكتين
دم العيال مفروك بريحة الطين
عضم العيال شاهد ليوم الدين
كاتبين بروحهم قصتك فيهم
ياشمس غزة
امتى راح تيجى
نبضك بينزف
دم ف وريدى
وانا بطنى جفت
والعيال ماتوا
هنجيب منين العزة للباقى
وكل واحد ملهى ف سكاته
الدرس باقى وعبرته واضحه
كان مره فيه اغصان زيتون طارحه
وبلاد فاتوها لحالها ومحاصره
قام شب عود الخضر للديان
ملعون ابو الاحباط ف كل زمان
تطرح ولادها ف هيئة الفرسان
وعيال بروحها بتفدى اوطانها
الكل باعها وهما مين صانها
اول ما درسوا ازاى يكونوا رجال
ياشمس غزة انا قلتلك موال
كل اللى صابك خف م الاحمال
كل اللى صانك شاف من الأهوال
كل اللى حبك حاله كان حالى
كومبارس صامت لحنه كان خالى
ياغزة ياللى ساكنه فالعالى
مين راح يصونك والجميع بايعين
أنا قلت احارب
قالوا قوم قاطع
فالنشرة شفتك
جايه ف مقاطع
دمك بينزف
بكرة اقوم اشجب
اصل النهاردة
النور كمان قاطع
هاعمل مظاهرة بجد
مش باكدب
وهالم أهلى
وعزوتى وناسى
وابكى على
دمك ف اوصالى
لايز وشيبسى
وبيبسى مش ناسى
وهابطل اكل بره علشانك
واشتم فى قلبى بشدة من هانك
وكل مايشتد فيكى الضرب
لمى الضحايا وشهدى علينا
واستنى مشهد يوم زوال الكرب
وانتظرى نخوة بجد
مش فينا
اقرأ أيضاً..تحميل كتاب سلاح التلميذ عربي الصف الرابع الابتدائي الترم الأول 2024
تسجيل استمارة الصف الثالث الاعدادي 2024
