“وايه جابك”.. نص شعرى لـ سما هيثم

وايه جابك ..؟
بتفتح للهوي من تاني ليه بابك ..
وايه مستتي اعملك ..
اهلل لك ..
واطبل لك ..
وافرش ورد لجنابك ..
دأيه جابك ..

سنين فاتت علي فراقك ..
تعال وعد اخطاءك ..
واشياءك بتسكن كل شىء مكسور
في قلبي البور
ودمعي اللي اتزرع جواه متين فدان
طرح أسوة
طرح اوجاعي في غيابك
فأيه جابك …؟!

هتجمع ايه بإيدك غير
ليالي بطول سواد عيني
وسهرت تشحت النوم اللي متفرفط
ويسقيني كاسات المر والحرمان …
وكل ما اقول كفاية يزيد
يقوللي كمان …
هتجمع أيه غير الشوك اللي جوا ف حضني والاحزان ..
هتستناني أقولك ايه ..
وانا الورقة اللي شدتها ..
وجبت سطورها ميت حتة ..
وخليتها ..
تطير في الجو متحنيّة بالدخان ..
تدوّر ليه وتاني تفر في كتابك
وايه جابك …؟
واشمعنا قول دلوقت جيت
ماانت ابتديت
وانت اللي قررت ونهيت
وقطعت خيط الملتقي
بعد اللقا
فارحم بقي..

بتنبش ليه
رماد قلبي اللي طفّيت ناره بالقوة..
دفنت آلامي جوا ف قلبي
تنبش تاني ليه جوا ..
خلاص هوّا
ما عدش بجد مستحمل
خلاص غصنه انكسر نصين
لا عاد ينفع ولا بيشفع ولا ينبّت
فليه ترجعله ومتبّت ..
رياح شوقي اللي مات هبّت
وهدمت معبدك بدري
وهدم الجرح محرابك
وقلبي اللي اندفن بإيديك
ماكنتش عامله في حسابك
فأيه جابك ..؟

بتفتح قفل ليه صدّي
و بيبان من عمر مقفولة
لا آخر قصة كنت انا ليك
ولا المية .. ولا الأولي..
فمتغنّيش كلام تافه
وهاتلك غنوة معقولة

بترجع ليه
وليه بتحن دلوقتي
خلاص وقتي
بقي الطير اللي هاجر فوق جناح مارس
وسابلك ساحة الاحلام
لوحدك بس يا فارس
فتبعد عني احسنلك
وشوف غيري
خلاص قلبي ما عدش ف درج ألعابك
ما انا الوردة اللي يوم ما الغصن فتّحها
دفنتها حية في ترابك
فقول دلوقتي أيه جابك ؟!..