قالّلي عارفه ؟
بنتك العسوله جايّه
خلي بالك من عينيا
اوعي يوصلها الحنين
او تشوف في عينيكي لهفه
او يبان شيئ بنداريه
او تلاحظ في ابتسامتي حاجه صدفه
وتقرا شئ في عينينا باين
غيرها قاعد مش قاريه
أو في بالها تقول وتسأل
ماما مالها
هيَّ حبت ولا إيه
قال لي عارفه ؟
قلت عارفه..
عارفه غيرة قلبها
على أي حاجه تخصني
ما انا أمها
رغم جَرأِتها الكبيره
إلا إني خط أحمر عندها
بنتي بقى وبتحبني
أكتر من اللازم فلازم تكشفك
مش هتتقبل غرامي بأي حد
وهتبقى ند لأي حد يبان قبالها
بنتي بقى وبقلبي دا متعلقه
قاللي طب حاسبي بقى
لا اللي بينا يكون واصلها
أو في بالها تقول وتسأل
ماما مالها
هي حبت ولا إيه
بنت قلبي وعارفه حالها
عارفه قوة احتمالها
قلبها ريشه فْ هويس
لو ألم في القلب طالها..
ربنا يحقق أملها
بادعي ربي يهدي بالها
لما تعرف شيئ وتيجي
بالدموع تواجهني بيه
أو في بالها تقول وتسأل
ماما مالها
هي حبت ولا ايه
قال لي عارفه؟
إن حدوتة هوانا
مهما خبينا ودارينا
ع الملأ هتكون حقيقه
قلت له إيه الطريقه
قال لي تعرف واحده واحده
من عينينا
ما احنا شوقنا كمان مالينا
واما تسأل ماما مالها
هي حبت ولا إيه
قولي حبت ألف حبت
ألف حبت واعمل ايه