الناس الحلوة اللى تطبطب
على قلبك لما النبض يقل
الناس اللى لا عمرها تزعل
مهما بيحصل و لا لحظه تمل
الناس اللى تطيب جرحك
أول ما تهل
الناس اللى تشارك فرحك
و قلوبهم فل
الناس اللى تملى تسامح
و بتعذر و تجود و تصالح
الناس الحلوة
الناس الحلوة اللى وجودهم
و عطاهم زاد
أقرب من روحك
و لروحك فرح و أعياد
فوانيس بتلالى فى ليل مخطوف
بيطمن قلبك لو ملهوف
و بيسبقوا دايما بسؤالهم
مدين لك إيدهم بالمعروف
الناس الحلوه
اللي وجودهم نعمة و إحسان
بتروق قلبك لو تعبان
وياهم بس نقول و نبوح
الناس دى ربيع بيرد الروح
الناس الحلوه
الناس الحلوة
رقيقة و صادقه بفعل و قول
هتعيش و تقابل دولا،، ودول
دول بنى آدمين و لا ملايكة
ف وسطنا عايشين؟
في الطبع الرايق والراقى
في سماحه و لين
ع الفطره الصافيه
قلوبهم دافيه
ماليها الحب
تخضر الخطوة
منين ما تدب
الناس دى معونة وهبها الرب
ازاي توفيها حروف ف سطور
و بأى لغات نوصفهم أو ينصفهم
قول؟
الناس دي يارب تخليها و ترزقها بناس
أجمل بخصالها
و أفعالها
ابقيها و يفضلوا دايما
قيما و زينة و تاج
ع الراس